🔴 كلية التجارة (كلية الشعب)
ليه كلية الشعب؟
- لأنها بتجمع كل الشعبات: علمي وأدبي، يعني هتلاقي اللي كان علمي رياضة مع اللي كان علمي علوم مع اللي كان أدبي قاعدين في نفس المدرج.
- وخريج تجارة بيتخرج منها يشتغل أي حاجة إلا التجارة نفسها 😂
- ممكن تلاقيه مهندس أو مبرمج، أو مدرس، أو حتى صيدلي! ولو لزم الأمر جدًا ممكن يشتغل دكتور في بعض الحالات.
- كلية التجارة تنسيقها بيبدأ تقريبًا من 65% لحد 75% على حسب الجامعة، ومفتوحة لعلمي وأدبي.
🔵 مدة الدراسة وطبيعتها
- 4 سنين دراسة.
- أول سنتين عامة، بتاخد فيها كل حاجة من محاسبة، اقتصاد، إدارة، إحصاء.
- من تالتة بتبدأ تختار تخصصك زي محاسبة أو إدارة أو اقتصاد أو تسويق.
🔵 لغة ونظام الدراسة
- عندك نظام عربي ونظام إنجلش.
- تجارة إنجلش مصاريفها أعلى بس فرصها في السوق أقوى شوية هنبقى نعمل عنها بوست لوحده.
🔵 أهم المواد اللي هتدرسها
- محاسبة مالية
- إدارة أعمال
- اقتصاد جزئي وكلي
- رياضيات وإحصاء
- تسويق
- تمويل وبنوك
- قانون تجاري
- ضرائب وتأمين
🔵 مرحلة التخصص
من سنة تالتة هتختار انت عايز تكمل في:
- محاسبة
- إدارة أعمال
- اقتصاد
- إحصاء وتأمين
- كل قسم ليه طبيعة شغل معينة.
🔵 مجالات الشغل بعد التخرج
- محاسب في شركات ومصانع وبنوك.
- شغل في البورصة والأسواق المالية.
- تسويق ومبيعات.
- ممكن تشتغل في التأمين أو الموارد البشرية أو اللوجستيك.
- ولو اشتغلت على نفسك في CMA / CPA هتفتحلك فرص جوة وبرة مصر.
🔵 مميزاتها
- كلية فيها فرص شغل كتير جدًا في السوق.
- مش محتاجة دماغ علمية معقدة زي هندسة أو علوم.
- ممكن مع شوية خبرة وكورسات تحقق دخل عالي جدًا.
🔵 عيوبها
- مليانة خريجين والمنافسة كبيرة، فلازم تميز نفسك.
- مرتبك في الأول مش كبير إلا لو دخلت بنك أو شركة كبيرة.
- محتاجة كورسات خارجية وتدريب كتير عشان تبقى مميز.
🔵 مين تنفع له ومين ما تنفعش؟
- تنفع للي دماغه شغالة أرقام وفلوس وتجارة وبيحب يشتغل مع الناس.
- ما تنفعش للي بيزهق بسرعة أو مش مهتم بالفلوس والبيزنس.
🔵 الخلاصة
- تجارة كلية عملية جدًا وسوقها واسع بس مشكلتها في الزحمة.
- لو ناوي تتعب على نفسك وتاخد شهادات مهنية، هتفرق جامد وتعمل فلوس.
- لو مش هتطور نفسك، هتفضل زيك زي ملايين خرجوا منها قبلك.
يارب نولها لكل طالب تعب واجتهد وسعى ليها 💙